Iha kolaborasaun entre UNCTAD no Governu, UE apoia Rezultadu Avaliasaun Prontidaun Komérsiu

eletróniku nian no dezenvolve Estratéjia Nasionál Komérsiu Eletróniku nian.

Esforsu hamutuk ida-ne'e subliña ami nia kompromisu hamutuk ba Timor-Leste nia transformasaun dijitál.

 

Entre 16 no 18 Jullu 2024, UE, iha parseria entre Ministériu Komérsiu no Indústria Timor-Leste no UNCTAD, realiza workshop ida iha Dili. Foku primáriu maka atu fó sai enkuadramentu estratéjiku hosi Estratéjia Nasionál Komérsiu Eletróniku Timor-Leste nian (NECS) no diskute deskobrimentu xave sira hosi Avaliasaun Prontidaun ba Komérsiu eletróniku.
Apoiu hosi Uniaun Europeia liuhosi Programa Ekonomia Dijitál Pasífiku (PDEP), nia halo parseria ho UNCTAD no governu hodi dezenvolve estratéjia nasionál komérsiu eletróniku ida hodi hasa'e prestasaun servisu públiku, hodi integra governu eletróniku. Hodi hadi'a asesibilidade, efisiénsia, no transparénsia, inisiativa sira governu eletróniku nian sei permite sidadaun sira, inklui sira ne'ebé iha área remota sira, atu asesu ba servisu sira, hametin responsabilizasaun, no harii abilidade dijitál sira iha forsa traballu nia laran, nune'e hasa'e governasaun no garante servisu públiku sira ne'ebé maka efetivu liu ba povu Timor-Leste.
Iha workshop ne’e, Embaixadór UE nian ba Timor-Leste, Marc Fiedrich, enfatiza nesesidade atu nasaun ne’e preparadu, liuliu ba komérsiu eletróniku, bainhira asesu ba internet hadia ona.

Embaixadór Marc hato’o ninia otimizmu iha workshop ne’e, hodi hateten, "Bainhira asesu ba internet hadi'a ona, dezenvolvimentu sira bele sai lalais se ita antisipa no prepara. Avaliasaun ida-ne’e fornese roteiru ida atu hadi’a fatór prontidaun sira-ne’e, hodi permite Timor-Leste atu integra ho efetivu liután iha ekonomia dijitál globál. Hodi rezolve lakuna sira ne'ebé identifika iha avaliasaun, nasaun bele hasa'e nia kompetitividade no atratividade ba investimentu sira ne'ebé sei presiza ka hetan benefísiu boot hosi iha komponente dijitál ida ne'ebé forte. Hirak-ne'e bele inklui edukasaun, turizmu, no buat hotu ne'ebé relasiona ho komérsiu no fornesementu sasán no servisu sira".
Avaliasaun Prontidaun Komérsiu eletróniku ida-ne’e nu’udar fundasaun ba estratéjia komérsiu eletróniku no reflete estadu atuál nia ekosistema komérsiu eletróniku iha Timor-Leste.
Estratéjia Nasionál Komérsiu Eletróniku trasa planu no polítika sira nasaun ida nian hodi haburas no apoia dezenvolvimentu komérsiu eletróniku. Ida-ne'e inklui inisiativa sira atu hadi'a infraestrutura dijitál, promove alfabetizasaun dijitál, kria ambiente regulatóriu ne'ebé konduzivu, no apoia negósiu lokál sira ne'ebé adota prátika komérsiu eletróniku.

Programa Ekonomia Dijitál Pasífiku maka inisiativa konjunta ida (finansia hosi UE no Austrália) ne'ebé entrega hosi Fundu Dezenvolvimentu Kapitál Nasoins Unidas nian, Programa Dezenvolvimentu Nasoins Unidas nian, no Komérsiu no Dezenvolvimentu ONU nian (UNCTAD) hodi apoia dezenvolvimentu ekonomia dijitál inkluzivu sira iha Pasífiku.

Atu hetan informasaun liután, kontaktu:

- Flávio Simões, Koordenadór no Asesór ba Sekretariadu NTFC (Konsultór),

   Adjuntu Jerente Programa nian; flaviosimoes.martins@gmail.com  

- Akito Ximenes, Ofisiál Imprensa no Informasaun,

   Delegasaun UE ba Timor-Leste; Akito-Francisco.DE-JESUS-X IMENES@eeas.europa.eu

 

Informasaun ne’e ajuda Ita-Boot?
Favor hakerek Ita-Boot nia hanoin no ajuda ami hadi’ak ami-nia konteúdu.