KONA-BA TRANZASAUN KOMERSIÁL SIRA IHA TIMOR-LESTE

Iha loron 13 fulan-agostu ne’e tama iha vigór Dekretu-Lei n.º 12/2024, loron 13 fulan-fevereiru, hodi estabelese rejime jurídiku jerál ne’ebé sei aplika ba tranzasaun, rejistu no asinatura eletrónika sira, nune’e mós ninia utilizasaun, liuliu, iha área komérsiu eletróniku.

Aprova no tama iha vigór diploma legál ida-ne’e akontese iha kuadru reforma lubuk ida-ne’ebé IX Governu Konstitusionál hasa’e daudaun ho objetivu atu habo’ot tan dinamizmu no transparénsia iha atividade ekonómika no atu kontribui hodi hadi’a ambiente negósiu sira, hodi sai fásil liután no atrativu atu halo komérsiu iha jerál no, liuliu, atu hafasil tranzasaun komersiál sira iha Timor-Leste.

Iha kontestu no dalan ida-ne’e, Ministériu Komérsiu no Indústria enkoraja loja, estabelesimentu no empreza komersiál hotu-hotu atu servisu, husi kedas agora no hamutuk ho sira-nia Banku Komersiál sira, atu hetán ekipamentu sira ne’ebé presiza hodi kria kondisaun téknika sira ne’ebéfó posibilidade ba sidadaun sira atu iha opsaun iha tranzasaun komersiál sira, hodi bele likidavalór sira ho osan ka liuhusi dalan eletrónika.

Ministériu Komérsiu no Indústria fiar katak instituisaun kompetente sira iha País ne’e, iha tempunatoon, sei foti inisiativa atu atualiza kuadru legál kona-ba pagamentu eletróniku sira, tanba ne’eimportante katak loja, estabelesimentu no empreza komersiál hotu-hotu prepara hela ba realidade foun ida-ne’e kona-ba dijitalizasaun.

Há’u aproveita oportunidade ida-ne’e atu renova hikas fali há’u nia apresiasaun ba ita-boot sira-niadedikasaun no servisu nafatin atu asegura abastesimentu bainbain populasaun nian no funsionamentu regulár merkadu nian iha Timor-Leste.

Informasaun ne’e ajuda Ita-Boot?
Favor hakerek Ita-Boot nia hanoin no ajuda ami hadi’ak ami-nia konteúdu.