MCI ho Timor-Aid Diskuti Planu Promosaun Tais

Dili, 11 Fevereiru 2025

Sua Exelénsia, Vise Ministru Komérsiu no Indústria (MCI), Sr. Augusto Júnior Trindade, hasoru malu ho reprezentante Timor-Aid, Sra. Ceo Lopes, iha Gabinete Vice Ministru, iha Mandarin Fomento, Dili.

Enkontru ne’e ho objetivu atu hato’o planu promosaun Tais ba MCI husi Timor-Aid. Reprezentante organizasaun ne’e destaka importánsia husi parseria entre entidade rua ne’e atu hametin promosaun Tais, hena tradisionál husi Timór-Leste, ne’ebé rekoñese nu’udar patrimóniu kulturál nasaun nian.

Sra. Ceo Lopes esplika katak Timor-Aid kolabora ona ho grupu kooperativa “Sorunain, ne’ebé forma husi artezanatu sira ne’ebé produz Tais”, no katak hakarak servisu hamutuk ho MCI hodi habelar nia promosaun.

“Ami mai diskute ho MCI maneira kolaborasaun hodi promove Tais, liu-liu husi feira ne’ebé organiza husi Ministériu, tantu iha eventu nasionál no internasionál, atu hatudu ba mundu katak Timor-Leste iha identidade kulturál ne’ebé úniku,” dehan reprezentante Timor-Aid ne’e.

Iha sorumutu Timor-Aid mós rekomenda atu iha futuru feira sira ne’ebé organiza husi MCI tenke koordena di’ak liután hodi inklui produtu sira ne’ebé halo husi artezanatu sira ne’ebé hetan apoiu husi organizasaun ne’e.

Vise-Ministru, Sr. Augusto Júnior Trindade hato’o nia agradesimentu ba Timor-Aid ba serbisu apoiu ba artezanatu “Sorunain”, hodi destaka katak promosaun Tais iha rai-laran nu’udar responsabilidade MCI nian.

“Ami toma nota ba sujestaun sira ne’ebé aprezenta. Promosaun ba produtu lokál ne’e hanesan kompromisu ida husi MCI, no atu alkansa ida ne’e ita presiza servisu hamutuk ho produtór sira, hodi garante katak Tais hetan valorizasaun nu’udar símbolu kulturál Timor-Leste nian”, afirma Vise-Ministro.

Membru governu ne’e mós rekoñese katak Tais nu’udar patrimóniu kulturál Timor-Leste nian. Tanba ne’e, nia destaka importánsia kolaborasaun hosi parte hotu-hotu, liuliu Timor-Aid, hodi promove no prezerva identidade tradisionál ne’e iha nível nasionál no internasionál.

Enkontru ne’e partisipa mós husi Xefe Gabinete VMCI, Diretór Nasionál Apoiu ba Mikro Ki’ik no Médiu Empreza, nune’e mós ekipa tékniku sira husi Timor-Aid.

 

 

  

Media_MCI

Informasaun ne’e ajuda Ita-Boot?
Favor hakerek Ita-Boot nia hanoin no ajuda ami hadi’ak ami-nia konteúdu.