EMPREZA GUANZHU HAKARAK LOKE FABRIKA IHA TIMOR-LESTE

Dili, 04 Marsu 2025

Iha tersa semana ne'e ekipa hosi empreza Guangzhu East Long Invest Group, husi nasaun Xina, parseria ho Suhurama Developer Unip Lda, hala’o reuniaun ho Ministru Komérsiu no Indústria Nino Pereira iha ninia gabinete, hodi aprezenta planu atu instala fabrika ne'ebé empreza ne’e hakarak hala'o iha Timor-Leste.

“Iha investimentu lubuk ida mak mai hosi Xina. Ida-ne'e hatudu kontribuisaun iha diversifikasaun ekonómia no mós kriasaun empregu. Ita-nia joven sira bele hetan oportunidade atu serbisu no hetan osan," dehan Ministru Nino Pereira hafoin sorumutu.

Governante ne’e mós realsa, IX Governu Konstitusionál nia polítika hakarak promove ekonómia ida ke inkluzivu, ne'ebé ema hotu-hotu bele senti katak sira mós nain ba rai ida ne’e.

"Ita mós presiza investimentu liután husi rai seluk. Timor-Leste tenki sai hanesan destinasaun ba investimentu di'ak ida. Bele sai fatin ba prosesamentu produtus no esportasaun. To'o ohin loron, Timor-Leste seida'uk iha balansu komersiál ho nasaun sira seluk. Timor-Leste importa barak liu." Ministru realsa.

Entaun, empreza lokál sira bele buka koneksaun ka halo ligasaun negósiu ho investór estranjeiru sira hodi loke fabrika balun iha ne’e atu bele produz buat ruma no kria empregu ba Timoroan sira.

Durante ne'e investor xinez sira maka iha interese maka'as atu investe iha Timor-Leste. Dezde Timor-Leste iha relasaun bilaterál ne'ebé metin no di'ak tebes.

Ministru Nino Pereira hatete Timor-Leste nia relasaun ho Xina ne’e di'ak, tanba iha relasaun ne’ebé promove maka'as hosi Prezidente Repúblika, Primeiru-Ministru, Ministru sira, no inklui mós Embaxadora Xina nian. Ida ne’e hatudu katak Timor-Leste presiza Xina no mós Xina presiza Timor-Leste.

Iha enkontru ne’e akompaña hosi ekipa Xina Guangzhu East Long Invest Group no mós kompañia Suhurama Developer Unip Lda.

 

 

 

Media_MCI

Informasaun ne’e ajuda Ita-Boot?
Favor hakerek Ita-Boot nia hanoin no ajuda ami hadi’ak ami-nia konteúdu.