MINISTRU NO VISE MINISTRU KOMERSIU NO INDUSTRIA

PARTISIPA IHA LANSAMENTU PROGRAMA “DALAN BA ASEAN”

Dili, 13 Marsu 2025

Sua Exelénsia, Ministru Komérsiu no Indústria, Sr. Nino Pereira, no Sua Exelénsia, Vise-Ministru Komérsiu no Indústria, Sr. Augusto Júnior Trindade, partisipa iha serimónia lansamentu programa “Dalan ba ASEAN”, ne’ebé hala’o iha salaun Jardim Sorte, iha Ministériu Negósiu Estranjeiru no Kooperasaun (MNEC), iha Pantai Kelapa, Dili.

Programa “Dalan ba ASEAN” kompostu husi kampaña nasionál ida hodi hasa’e konxiénsia ba komunidade sira kona-ba importánsia husi Timor-Leste atu adere ba ASEAN.

Inisiativa ne’e hetan apoiu hosi Uniaun Europeia no dezenvolve iha kolaborasaun ho Ministériu Administrasaun Estatál, liuhosi Autoridade Munisípiu sira, hodi lori informasaun ba komunidade sira kona-ba benefísiu hosi adezaun Timor-Leste ba ASEAN.

Serimónia lansamentu ne’e ofisialmente prezide husi Sua Exelénsia, Vise Primeiru Ministru, Ministru Koordenadór ba Asuntu Ekonómiku no Ministru Turizmu no Ambiente, Sr. Francisco Kalbuadi Lay, akompaña husi Sua Exelénsia, Ministru Negósiu Estranjeiru no Kooperasaun, Sr. Bendito Freitas, aleinde Ministru no Vise-Ministru Komérsiu Indústria, membru governu sira seluk, reprezentante korpu diplomátiku no konvidadus seluk.

Mídia_MCI

Informasaun ne’e ajuda Ita-Boot?
Favor hakerek Ita-Boot nia hanoin no ajuda ami hadi’ak ami-nia konteúdu.