Perguntas frekuentes

 

Trade Invest mak nain ba konteúdu ida ne'e.Haree sira-nia website atu hatene saída mak baibain ema husu liuliu (perguntas frekuentes - FAQs, sigla ho lian inglés) kona-ba rekizitu regulamentár ba importasaun/esportasaun.

 

1. Timor-Leste ninia produtu prinsipál sira (la’ós petrolíferu) ba esportasaun mak saída?

Produtu prinsipál esporta husi Timor-Leste mak kafé, alfarroba, algas mariñas (“budu-tasi”), beterraba, tohik no sukata. Produtu sira seluk ne’ebé baibain esporta mak Kamii, Óleu-Kamii, Nu’u, Óleu-Nu’u, Óleu Vírjen Nu’u nian, kopra, sándalu (bele esporta dala ida de’it iha kada períodu tinan tolu ka haat), Baunilla, Maek, Konjac, no hena Tais.

 

2. Sá merkadu-alvu mak baibain komersiante sira hakarak esporta ba?

Austrália, Kanadá, Xina, Hong Kong, Indonézia, Japaun, Marrokus, Nova Zelándia, Singapure, Afrika Sul, Suísa, Uniaun Europeia (Paízes Baixus, Portugal, España, Alemaña), Reinu Unidu no Estadus Unidus Amérika.

 

3. Molok halo esportasaun, saída loos mak tenke halo ein-jerál?

• Hala’o estudu ba merkadu no kompreende Ita-Boot ninia kliente ka kliente potensiál sira.
• Halo kontaktu, negoseia ho Ita-Boot ninia kliente no haruka amostras, karik presiza.
• Prepara dokumentus relevantes: rejistu negósiu, lisensa komersiál, lisensa ba esportasaun komersiál, sertifikadu fitosanitáriu, sertidaun dívidas, NIF, Sertifikadu Oríjen, deklarasaun aduaneira.
• Kontrata despaxante aduaneiru ida (la’os obrigatóriu) ba atividade sira relasionada ho klientes.
• Verifika kalendáriu kona-ba movimentasaun ró karga nian, rezerva kontentór, prepara lista embalájen no fatura.

 

4. Sá Ministériu/liña ajénsia sira mak envolve iha prosesu esportasaun no sira-nia knaar mak saída?
   • SERVE emite rejistu negósiu no lisensa komersiál ba empreza sira.
   • Autoridade Tributária emite NIF no sertidaun dívidas ba empreza sira.
   • Diresaun Nasionál Kuarentena no BioSeguransa, MAP, emite Autorizasaun ba Esportasaun no Sertifikadu Fitosanitáriu.
   • MCI emite Sertifikadu Oríjen.
   • Autoridade Aduaneira hato’o formuláriu DAU (Deklarasaun Aduaneira Únika) ba empreza preenxe no hala’o inspesaun.

 

5. Saída mak empreza tenke halo atu haktuir rekizitu sira?

·       Empreza tenke submete Sertifikadu Autorizasaun Komersiál, Estatutus Sosiedade nian, NIF (Númeru Identifikasaun Fiskál) no Sertifikadu Riskus ba SERVE atu hetan rejistu negósiu no lisensa komersiál.

·       Preenxe Formuláriu ba Pedidu Rejistu Negósiu no Lisensiamentu (SERVE F1-3). Haree Aneksu A ba rekizitus sira ba tipu negósiu oioin.

·       Submete kópias dokumentu sira, ein papél, ba Gabinete SERVE nian.

·       Preenxe Formuláriu Pedidu atu hetan NIF.

·       Tipu negósiu oioin presiza preenxe formuláriu oinseluk, haree Aneksu B.

·       Submete dokumentus via email ba Autoridade Tributária (info@attl.gov.tl).

·       Preenxe formuláriu Dívidas atu hetan sertidaun dívidas.

·       Empreza sira tenke submete dokumentu sira tuir mai ne’e: estatutus sosiedade nian, lisensa komersiál, mapa lokalizasaun, Billete Identidade Administrador nian, no negósiu-nain nian.

·       Submete dokumentus via email ba Autoridade Tributária (info@attl.gov.tl).

·       Empreza sira tenke preenxe formuláriu relasionadu ho lisensa esportasaun no kuarentena husi MAP no submete rejistu negósiu, lisensa komersiál, NIF, sertifikadu dívidas atu hetan lisensa esportasaun.

·       Bele foti husi Gabinete MAP Formuláriu sira relasionadu ho prosesu kuarentena.

·       Submete kópias dokumentu sira, ein-papél, ba Diresaun Nasionál Kuarentena no Bioseguransa MAP nian.

·       Empreza sira tenke submete dokumentu sira tuir mai atu hetan Sertifikadu Oríjen: Koñesimentu Rezerva Kontentór (Bill of Booking Container) (husi ajénsia marítima), fatura produtus nian (kuantidade no kustu sira), lisensa komersiál, lista embalájen, deklarasaun aduaneira, sertidaun dívidas, NIF, karta ho pedidu ba MTKI (inklui merkadorias sira atu esporta), Billete Identidade Administrador Empreza nian.

·       Bele foti formuláriu sira relasionadu ho Sertifikadu Oríjen husi Gabinete MTKI.

·       Submete kópias dokumentu sira, ein-papél, ba  Gabinete Diresaun Komérsiu Esternu (MTKI).

·       Empreza sira tenke preenxe Deklarasaun Aduaneira Únika (DAU) husi Autoridade Aduaneira.

·       Bele iha asesu ba informasaun hothotu no formuláriu sira iha Autoridade Aduaneira ninia website www.custom.gov.tl. Dokumentu 200 no SOP sira mak tau iha ne’ebá ba públiku bele asesu – iha lian tetum, inglés no portugés.

·       Submete DAU, ein papél, ba Autoridade Aduaneira (sei prepara hela prosesu aprezentasaun kópia eletrónika ba Portu Tibar).

 

6. Saída mak tenke halo bainhira aprezenta dokumentu sira?

. Asegura katak dokumentu nesesáriu sira (ba esportasaun no mós ba importasaun) no formuláriu sira preenxe no kompleta hotu ona.

. Asegura katak submete dokumentu hothotu ho antesedénsia.

 

7. Sá departamentu/s iha Ministériu/ajénsia sira bele hatán ba pergunta sira relasionada ho esportasaun?

Autoridade Aduaneira: Diresaun Nasional Operasoins ba esportasaun no Diresaun Nasional Konformidade ba reklamasaun ka investigasaun suspeita sira, etc.

.       Autoridade Aduaneira: Unidade Informasaun

.       SERVE: Departamentu Rejistu

.       MAP: Diresaun Nasionál Kuarentena no Bioseguransa

.       MTKI: Diresaun Nasionál Komérsiu Esternu

Bele bá rasik hato’o perguntas (vizita gabinete relevante sira), kontakta liuhusi telefone, ka liuhusi karta.

 

8. Produtu oioin ezije rekizitu ka dokumentu oioin? Purezemplu, agrikultura (produtu fresku vs. produtu prosesadu)

· Ba karga jerál, empreza sira tenke aprezenta lista embalájem, fatura komersiál, NIF, sertidaun dívida no lisensa komersiál.

· Iha rekizitu oioin ba faze rejistu iha SERVE, haree Aneksu A.

· Iha rekizitu oioin ba dokumentus kuarentena iha MAP. Maibé, ba rejistu komersiál, sertidaun dívida no NIF, rekisitu sira hanesan de’it.

· Iha rekizitu oioin ba Sertifikadu Oríjen iha MTKI. Favór verifika ho Gabinete MTKI.

· Produtu alimentár sira no animal moris bele presiza autorizasaun espesiál no kontrolu ruma husi Diresaun Nasionál Kuarentena no Bioseguransa Timor-Leste. Empreza tenke konfirma diretamente ho Diresaun Nasionál Kuarentena no Bioseguransa sá rekizitu potensiál mak entidade ne’e ezije haktuir atu bele hetan autorizasaun ba esportasaun. Haree pájina 10 ba lista merkadorias ne’ebé hatudu sira ne’ebé sujeita ba rekizitu espesiál.  

 

9. Sá rekizitus mak empreza sira tenke kumpre, espesifikamente, ho produtus agríkolas?

Ba produtu agríkola sira, importante iha lista embalájen, fatura komersiál no relatóriu husi laboratóriu kona-ba produtu sira

 

10. Tanba Timor-Leste la iha laboratóriu atu analiza produtu agríkola sira, saída mak empreza presiza halo, karik presiza verifika sira-nia produtu molok esportasaun? Sira presiza bá ne’ebé?

Agora dadaun empreza sira bele haruka amostras husi sira-nia produtus agríkolas ba laboratóriu iha rai-liur halo análize (laboratóriu emprezariál).